هي النجمة اللي وجودها… نور نص القمر التاني
وهو القمر اللي لنورها… ارتاح ف ثواني
هي الحدوتة الحلوة وشافها الراوي
وهو الراوي و لازم يحكي … مش ح يداري
قال الراوي:
حبيبتي جميلة كحيلة
تشوفها تقول أنا شفت أميرة؟
قال الراوي:
حبيتي أصيلة أصيلة
أيوه ياسيدي… ما هي بنت جليلة
قال الراوي:
لا أحمر ولا أصفر
هو الرمش, الرمش الأسمر…
ولا كلامها العربي السكر
قال الراوي و عاد الراوي…
و شافها عازولي…قال لي:
فيها ايه يعني ؟؟
قال الراوي:
فيها ايه يعني!!
لا…
ده فيها و فيها
فيها و فيها اللي مخليني…
طاير بيها ف كل سنيني
فيها أغنية أنا بسمعها…
لما بشوف فرحة ف عنيها
فيها حدوتة بنت جميلة…
بتكلمني… ح رد عليها
تتجوزيني؟
,,
قالت ايوه…قالت ايوه
قال الراوي…
همَّ الخمسة:
بلادي بلادك…ماطرح مايكون… مكاني مكانك
آدي الأولى…
أما التانية فأهلك أهلي…
لو في الفرح أنا واحد منهم
ولو في الجرح أشيل أنا عنهم
ولو في الضيق… بأمر الله حفرج عنهم
آدي التانية … و التالتة التالتة
أمي… أمي… أمي…
حبيبتي الأولى… رضاها سعادتك
تفرح منك… ف عنيا أنا أشيلك
تزعل منك… حتخدي نصيبك
أما الرابعة ف جوزك جوزك
غايب حاضر… حافظة مقامه
ساكت قايل… سامعة كلامه
عينك منه… ده طيرك طيرك
حافظي عليه…. يكتر خيرك
لو شال حبك… يعيش يكرمك
ولو طهقتيه… عمره ما يظلمك.
أما الخامسة ف بيتك بيتك
مهما يكون سرك ف حيطانه
نفسك تتعاتبي؟… بيتك عنوانه
تروحي و تيجي… بزمانه ف أوانه
آدي الخمسة و ايدي ف ايدك:
عهد عليا… الله يرضيكي…
و يرضى عني…متقربي مني؟
عهد عليا… وايدي ف ايدك:
بسم الله… الراوي نصيبك.